Per Kjetil Våtmyr vann Næringslivsprisen
Prisvinnaren fekk via Teams overrekt diplom og gåvekort av ordførar Olav Harald Ulstein under kommunestyremøte 29. september.
Sidan 1990 har styret i Sykkylven Næringsutvikling delt ut ein pris til personar, bedrifter eller organisasjonar som har markert lokalt næringsliv på ein særs gagnleg måte, stått fram som eit føredøme for andre, vist mot og handlekraft, nytenking og samarbeidsvilje, med mål om ei berekraftig utvikling for Sykkylven.
Styret fekk inn 15 gode forslag etter utlysing av Næringslivsprisen (tidlegare kalla Innsatsprisen) i august, og var heilt einige ved utveljing av årets kandidat.
Vinnaren av Næringslivsprisen 2025 er eit utprega ja-menneske, med evne til å mobilisere breitt og få mange med på laget. Han har vist stort pågangsmot og bidrege til å markere lokalt næringsliv på ein særs gagnleg måte. Interessa for lokal industri og næringsliv har nådd eit større og breiare publikum – i bedrifter og skular, ja til og med i barnehagane – gjennom hans initiativ til den årlege Teknologifestivalen og TF Ung.
Som leiar av Sykkylven Industri- og Næringslag gjennom fleire år har han vore ein pådrivar for betre rammevilkår i industrien, styrking av yrkesfagleg utdanning, fleire læreplassar og tettare regionalt samarbeid.
Per Kjetil Våtmyr er ein særs driftig eldsjel, og eit førebilete for både nytenking og samarbeid. Under kommunestyremøtet 29. september fekk han via Teams overrekt diplom og gåvekort av ordførar Olav Harald Ulstein som synleg bevis på heideren.