People of the North kjem til Sykkylven

Etter ei positiv mottaking frå kommune og næringsliv, er no avtalen signert og spleiselaget på plass. Delar av episoden skal spelast inn under Teknologifestivalen 5.-6. juni 2025, og resten i august.

‍

Verdifull synleggjering

Prosjektet gir Sykkylven ein unik moglegheit til å vise fram møbelindustrien, teknologimiljøet, naturen og menneska som bur her - både for internasjonalt publikum og i nasjonal samanheng. Serien har gått med stor suksess på PBS i USA og i fleire land i Europa og Asia. I Noreg vert serien vist under namnet Furet Værbitt på Altibox.

Episoden frå Sykkylven får ein speletid på 30 minutt, og vert produsert av Tellus Works Television i samarbeid med Arne Hjeltnes. Det blir òg produsert ein eigen marknadsfilm som kommunen og næringslivet fritt kan bruke til rekruttering, bolyst og profilering.

‍

Lokal medverknad og finansiering

Produksjonskostnaden for ein episode er på 1,5 millionar kroner, der halvparten skal finansierast lokalt. Sykkylven kommune har bidrege med midlar frå bolystprogrammet, medan næringslivet i kommunen har gått saman om å dekke resten.

Filmen vert utvikla i tett samarbeid mellom Tellus, Arne Hjeltnes og Sykkylven Næringsutvikling, og fleire lokale aktørar skal deltake i programmet - både bedrifter og enkeltpersonar.

‍

Om serien

People of the North er ein dokumentarserie om det moderne Noreg - med fokus på næringsliv, reiseliv, kultur og natur. Serien vert produsert for internasjonal distribusjon, og skal i første omgang visast på PBS, den største offentlege kringkastaren i USA. Deretter vert den gjort tilgjengeleg på ulike plattformer og TV-kanalar internasjonalt, samt i Noreg.

Sjå meir om serien her: https://www.peopleofthenorth.net/